29 ივლისს, მესტიაში ფესტივალი „სვანეთობა 2018“ უმასპინძლებს რეგიონალურ ფოლკლორულ ფესტივალს „ფუძეობა“-ს, რომლის მიზანია საქართველოს რეგიონალური კულტურის განვითარების ხელშეწყობა და მხარდაჭერა. 
ღონისძიებაში მონაწილეობას მიიღებენ, როგორც ადგილობრივი ფოლკლორის წარმომადგენლები, ასევე პოპულარული ქართველი შემსრულებლები. პროექტი ფოლკლორის სფეროში მოღვაწე ადამიანებს მისცემს საშუალებას, წარმოაჩინონ საკუთარი შესაძლებლობები, წარადგინონ საკუთარი ნაშრომები.
ფესტივალის ფორმატიდან გამომდინარე პრიზებით დაჯილდოვდებიან ფოლკლორის სფეროში მოღვაწე ადამიანები 
ფესტივალის ფარგლებში გაიხსნება სამეწარმეო მარკეტი „აწარმოე საქართველოში“ მხარდაჭერით, რომელშიც წარმოდგენილი იქნება 30 მეწარმე.
დაიდგმება სავაჭრო ფურა, სადაც გაიყიდება ჰოთ-დოგები და ლუდი, მოეწყობა შეჯიბრი ლუდის სმაში. 
პროექტის ფარგლებში ასევე წარმოდგენილი იქნება საბავშვო კუთხე, სადაც გაიმართება სხვადასხვა გასართობი აქტივობები.
ფესტივალის ფარგლებში მოხდება ტრადიციული სვანური სამზარეულოსა და ხალხური რეწვის ნიმუშების გამოფენა. ადგილობრივ მოსახლეობას, ჩამოსულ ქართველ თუ უცხოელ სტუმრებს, შესაძლებლობა ექნებათ ფესტივალის მიმდინარეობის დროს მესტიის მუნიციპალიტეტის ტერიტორიული ერთეულების პავილიონებთან დააგემოვნონ სვანური ტრადიციული სამზარეულო, ასევე დაათვალიერონ პავილიონებში წარმოდგენილი ხალხური რეწვის ოსტატების ნამუშევრები. 

ფესტივალის დასკვნით ეტაპზე, საღამოს 8 საათზე თქვენთვის ჯგუფი "რეგიონი" იმღერებს.

ფესტივალი მესტიის მუნიციპალიტეტის მერიისა და საქართველოს ტურიზმის ეროვნული ცენტრის, პროექტ  CHECK IN GEORGIA-ს მხარდაჭერით ხორციელდება